പ്രതീക്ഷകൾ

ആകാശത്തിൻ്റെ ഒരു കീറ് കിട്ടി -

ചിറകൊന്നു നീട്ടി പറക്കണമെങ്കിൽ ആകാശക്കീറ് ഇനിയും മെനഞ്ഞെടുക്കണം.

പണ്ടു പണിതു വച്ച സൂചിയുണ്ട്.

പക്ഷേ നൂലിനു നന്നേ നീളം കുറവ്...!

കിനാവു നെയ്തും തൂവലിൽ നിറം തുന്നിയും

എല്ലാം തീർന്നു പോയി.

പരുത്തിക്കാട്ടിൽ പരുത്തിയില്ലെന്ന് .....!

എങ്കിലെന്ത്?

മഴക്ക് നൂലുണ്ട് .

അപ്പൂപ്പൻ താടിക്കും നൂലുണ്ട് ..........

രാത്രിയിൽ നിലാവിനോട് ചോദിക്കാം '

'സ്വർണ്ണ നൂലിൽ നിന്ന് ഇത്തിരിയോളം കടം തരുവാൻ' -

മെനഞ്ഞു തീർന്ന ആകാശത്തിൽ പറന്നു ചെന്ന് നിലാവിൻ്റെ കടം വീട്ടാം...

ഷെമീറ റാഫി