മിഴികളിൽ തെളിയും നീല വാനം

മിഴികളിൽ തെളിയും നീല വാനം

ഓർമ്മകൾ ....... അതിൽ പറവകളാകവേ,

ചിറകോടു ചേർന്ന ചെറു മേഘങ്ങൾ അലകളായ്.... നീങ്ങിയകലവെ

തെളിവാർന്നകന്ന കാറ്റിൽ കൊഴിഞ്ഞ നറുതൂവലായെൻ്റെ പരിദേവനങ്ങൾ

അഴകാർന്ന നയനങ്ങളിൽ പാർവ്വണേന്ദുവുണരുമ്പോൾ

പ്രതിബിംബമായെന്നിലാകാശ- ഗംഗകൾ ... അതിലൊഴുകിയണയുവാനിക്കരെ

പൂത്തുമ്പയിൽ തീർത്ത ചെറുവഞ്ചിയിൽ - കാത്തു നിൽക്കയാണു ഞാൻ,

മിഴിക്കോണിലെ കടവിൽ ഏകനായ്...

ഇനിയുമൊരു നീർത്തുള്ളിയും പൊഴിയാതെ -

അതിലെൻ്റെ തോണിയുലയാതെ നിന്നിൽ ചേർന്നിടാൻ -

ഇതു മതിയെൻ്റെ കിനാക്കളും പേറി മെല്ലെത്തുഴഞ്ഞിടാൻ .

നീ തന്ന ഓർമ്മയിൽ നിന്നു ഞാനടർത്തിയ ചില്ലയിൽ കടഞ്ഞ തുഴയും

മതിയേതു ബന്ധന ചുഴിയിലും - വീഴാതെയാ വാനിലണയുവാൻ .

ഷെമീറ റാഫി