പെണ്ണ്

പെണ്ണ്

പെയ്യുന്നില്ലയോ.....?

ഒരു വലിയ നീർക്കുടമേന്തിയ മേഘത്തെപ്പോൽ

ഒന്നാർത്തലച്ചു പെയ്യാത്തതെന്ത്?

മേഘവാനമാണ് പെയ്യുന്നതെന്നു ലോകം ...!

വാനമല്ല - മാനമുള്ള പെണ്ണാണ് പെയ്തു തീർക്കുന്നതെന്ന് ഞാനും.

നിലയ്ക്കാതെ പോവാൻ തിരമാലയല്ല, സ്വപ്നങ്ങളായിരുന്നല്ലോ.

നിറങ്ങൾ പെറുക്കി ചായം കൊടുത്തും നിലാവത്തിട്ടുണക്കിയും

അവൾ ഏറെനീളം നെയ്തു കൂട്ടിയ കിനാക്കൾ!

ഒരു താലിച്ചരടിന് വിലയ്ക്കുവാങ്ങിയവൻ

നെയ്തെടുത്തതിൽ പാതിയും അന്തിക്കൂട്ടിനു ചൂട്ടു കെട്ടി. -

പാതിയിൽ പതറാതിരുന്നിട്ടും ജീവിത യാത്രതൻ തമസ്സിൽ,

പിൻവിളിയോർത്തു നിന്ദ്യയായ് നിൽക്കാതെ , ഇടറും വഴികളിൽ

വെട്ടമായുരുകിയും - പിന്നെ പൈതങ്ങൾക്കന്നമായും ...

നെയ്തതിൽ ബാക്കിയും എരിച്ചു തീർത്തു.

ശ്വാസം നിലയ്ക്കും പുകയിൽ പിടഞ്ഞ അവളുടെ

ഗദ്ഗദങ്ങൾ ചേർന്നു ചേർന്ന് ഒരു വൻചുഴലിയായ് -

ശാന്തി കിട്ടാത്ത കിനാവിൻ്റെ ആത്മാവുമായി ലക്ഷ്യം തെറ്റി - ഉയർന്നുയർന്ന് .....അങ്ങുദൂരെ വാനിൽ അലിയാതെ

ആ കറുത്ത ചുഴലിക്കാറ്റ് - ചുഴറ്റിയെറിഞ്ഞ മോഹങ്ങളെല്ലാം കീറി പറിഞ്ഞ

കാർമേഘങ്ങളായി ...... ഇരുണ്ടു കൂടി.

കറുത്ത മേഘങ്ങൾ പെയ്തു തോരും..?

താഴെ നിറഞ്ഞ മിഴികൾ എന്നു തോരും?

ഒന്നാർത്തു പെയ്തിരുന്നെങ്കിൽ...

അതിലലിഞ്ഞ് അങ്ങ് ഇല്ലാണ്ടായെങ്കിൽ........

ഷെമീറ റാഫി